Երեք նոր մոդելներն էլ ստացել են երկշարժիչ լիաքարշակ համակարգ, GT ռեժիմ, էլեկտրոնային կառավարմամբ կախոց,
ոլորող մոմենտի բաշխման համակարգ և Virtual Gear Shift ու Active Sound Design տեխնոլոգիաներ։ Դրանք
նմանակում են փոխանցումների փոփոխությունը և ավելացնում ձայնային հետադարձ կապ՝ մեքենայի
արձագանքունակության զգացողությունն ուժեղացնելու համար։ Launch Control-ը, Performance Timer-ը և GT-ի
հատուկ միջերեսները լրացնում են մոդելների դինամիկ բնույթը։

EV3 GT-ն զարգացնում է 215 կՎտ (292 ձ․ու․) հզորություն և 468 Ն⋅մ ոլորող մոմենտ, 0-ից 100 կմ/ժ է արագանում
5,7 վայրկյանում և WLTP ցիկլով առաջարկում է մինչև 501 կմ ընթացքի պաշար։ EV4 GT-ն նույն հզորությամբ ու
ոլորող մոմենտով 100 կմ/ժ է հասնում 5,6 վայրկյանում․ ֆասթբեքի ընթացքի պաշարը հասնում է մինչև 537 կմ-ի, իսկ
հեչբեքինը՝ մինչև 505 կմ-ի։ EV5 GT-ն ստացել է 225 կՎտ (306 ձ․ու․) հզորություն և 480 Ն⋅մ ոլորող մոմենտ․ 0-ից
100 կմ/ժ է արագանում 6,2 վայրկյանում, իսկ 81,4 կՎտ⋅ժ մարտկոցով WLTP ցիկլով ապահովում է մինչև 476 կմ
ընթացքի պաշար։

Մոդելներն առանձնանում են իրենց բնույթով և նշանակությամբ։ EV3 GT-ն ուղղված է քաղաքում մանևրելիությանը,
EV4 GT-ն՝ ղեկավարման ճշգրտությանն ու վարելու հաճույքին, իսկ EV5 GT-ն դինամիկան համատեղում է ընտանեկան
քրոսովերի ընդարձակության և բազմաֆունկցիոնալության հետ։ EV5 GT-ի համար նախատեսված է նաև Pet Mode
ռեժիմը, որը կարճ ժամանակով սրահում մնացած ընտանի կենդանու համար պահպանում է անվտանգ և հարմարավետ
ջերմաստիճան։

GT տարբերակները տեսողականորեն առանձնանում են սպորտային կիսաթասաձև նստատեղերով, նեոնային կանաչ
շեշտադրումներով, հատուկ ղեկերով, 20-դյույմանոց անիվներով և արգելակային սուպորտներով։ Միացված
գործառույթների թվում են մեքենայի էկրանից կայանատեղիի վճարումը, հոսքային ծառայությունները, ներկառուցված Wi-
Fi կետը և հեռակա թարմացումները։ Kia-ն գներն ու վերջնական տեխնիկական բնութագրերը խոստանում է հրապարակել
ավելի ուշ։